- श्री. संत निवृत्तीनाथ महाराज पालखीने पंढरपूरकडे प्रस्थान
त्र्यंबकेश्वर | ०२ जून २०२३, गुरू न्यूज नेटवर्क :
श्री. क्षेत्र त्र्यंबकेश्वर संत निवृत्तीनाथ महाराज समाधी मंदिराहून पालखीचे पंढरपूरकडे आज प्रस्थान झाले आहे. या पालखी सोहळ्यासाठी वारकरी मंडळी २५ दिवस पायी प्रवास करणार आहे. या पालखीतील वारकरी संप्रदायातील भाविकांची गर्दी दिवसेंदिवस वाढतच चालली आहे. त्रंबकेश्वरहून निघालेली दिंडी आषाढ शुद्ध दशमी रोजी पंढरपूरात पोहोचणार आहेत.
त्रंबकेश्वर मधून वीस हजार भाविक टाळ मृदंगाच्या गजरात पालखी मार्गस्थ झाली असून, प्रत्येक गावातून दिंडी जात असताना त्यात भाविकांची गर्दी वाढ होत असते. एक लाखाहून अधिक भाविक या पालखी सोहळ्यात सामील होत असतात. माझ्या जीवाची आवडीने पंढरपुरा गुढी असे अभंग म्हणत वारकरी या वारीत सहभागी झाले. सुरुवातीला संत निवृत्तीनाथ मंदिरात महापूजा करून, त्यानंतर रथाची पूजा करण्यात आली. चांदीच्या रथात निवृत्तीनाथ महाराजांच्या पादुका ठेवण्यात आल्या. निवृत्तीनाथ महाराज की जय, ज्ञानोबा माऊली तुकारामचा गजर करीत पालखी मार्गस्थ झाली. कुशावर्त तीर्थावर पालखीचे नगरपालिकेच्या वतीने स्वागत करण्यात आले.
नाशिक जिल्हा परिषदेकडून दरवर्षी प्रमाणे आरोग्य पथक व पाण्याचा टँकर पुरवला जातो. त्यासाठी जिल्हा परिषदेच्या निधीतून चार लाख रुपयांची तरतूद केली जाते. मात्र, एवढया मोठया दिंडी सोहळ्यात ही सुविधा अपुरी पडत आहे. यामुळे वारकऱ्यांची गैरसोय होऊ नये याकरिता श्री. संत निवृत्तीनाथ महाराज समाधी मंदिर देवस्थानच्या विश्वस्तांनी जिल्हाधिकारी कार्यालयास निर्मलवारीसाठी फिरते टॉयलेट व पिण्याच्या पाण्यासाठी टँकर सुविधा पुरवण्याची मागणी केली होती. त्या मागणीला प्रतिसाद देत पालखी सोहळ्यासाठी पिण्याच्या पाण्याचा पुरवठा करणारे पाच टँकर्स पंढरपूरपर्यंत पुरवण्याचा निर्णय जिल्हा प्रशासनाने घेतला असून, या शिवाय १२ फिरते टॉयलेट्स देखील पुरवण्याचा निर्णय घेण्यात आला आहे. यामुळे श्री. संत निवृत्तीनाथ महाराज पालखी सोहळा आता निर्मलवारी होणार आहे. यासाठी यंदा प्रथमच ३० लाख रुपयांचा निधी जिल्हा नियोजन समिती कडून उपलब्ध करून दिला आहे.
