सिन्नरच्या आरोपींचा सहभाग नाशिकमध्ये बनावट नोटा तयार करणाऱ्या टोळीला अटक,

नाशिकमध्ये बनावट नोटा तयार करणाऱ्या टोळीला अटक,

तीन जण ताब्यात

सिन्नर | गुरू न्यूज नेटवर्क : www.gurunews.co.in

नाशिक येथील अंबड पोलीस ठाण्याच्या हद्दीत पाचशे रुपयांच्या बनावट नोटा छापून विक्री करणारे रॅकेट उघडकीस आल्याने, त्या बाबतची चौकशी अंबड पोलिस करत असून, तीन संशयितांना अटक केली आहे. तर एक जण फरार झाला असल्याचे पोलिसांनी सांगितले.

बनावट नोटा बनवणाऱ्या फरार आरोपीच्या शोधासाठी पोलिस पथके रवाना करण्यात आली असून, पोलिसांना मिळालेल्या माहितीच्या आधारे सापळा रचून ही कारवाई करण्यात आली.

याबाबत अधिक माहिती अशी की, पोलीस अंमलदार संदीप भुरे यांना मिळालेल्या गोपनीय माहितीनुसार अशोक अण्णा पगार ( वय ४४, मु. पो. मेंढी ता. सिन्नर, जि. नाशिक ) हा बनावट नोटा चलन बाजारात आणणार असल्याची माहिती पोलिसांना मिळाल्याने मा. भुरे यांनी वरिष्ठ पोलीस निरीक्षक दिलीप ठाकूर व पोलीस निरीक्षक गुन्हे शाखेचे अधिकारी सुनील पवार यांना दिली. यावरून त्यांनी सहाय्यक पोलीस निरीक्षक के. टी. रौंदळे, अंमलदार किरण गायकवाड, संदीप भुरे, सागर जाधव, राहुल जगझाप, घनश्याम भोये, सुचितसिंग सोळुंके, राकेश पाटील, पवन परदेशी, मते, राठोड, सचिन करंजे यांचे पथक तयार करून माऊली लॉन्स येथे सापळा रचण्यात आला.

यावेळी पाचशे रुपयाच्या बनावट तीस नोटा आढळल्या असून, माऊली लॉन्स येथे पगारे आला असता पोलिसांनी त्याला ताब्यात घेत त्याची झडती घेतली. यावेळी त्याच्याकडे पाचशे रुपये किमतीच्या तीस बनावट नोटा आढळल्या. यावरून पोलिसांनी त्याला अटक करून चौकशी केली असता या गुन्ह्यात हेमंत कोल्हे, नंदकुमार मुरकुटे व भानुदास वाघ यांनी सिन्नर येथील एका हॉटेलमध्ये बनावट नोटा बनवल्याचे सांगितले.

यावरून पोलिसांनी गुन्हे प्रकटीकरणाचे अधिकारी व अंमलदारांचे दोन तपास पथके तयार करून संशयित हेमंत लक्ष्मण कोल्हे ( मुळ राहणार सिडको सध्या राहणार ३२, रा. सेक्टर नंबर 10, आनंद निवास, प्लॉट नंबर १०१, पहिला मजला, वाशी, नवी मुंबई ) यास नाशिक मधून अटक केली तर नंदकुमार तुकाराम मुरकुटे ( वय ५२, रा. संजीवनी हॉस्पिटल मागे, सोनार गल्ली, ता. सिन्नर, जि. नाशिक ) यास सिन्नर येथून सापळा रचून अटक केली. तर चौथा संशयित भानुदास वाघ ( रा. नांदूर शिंगोटे ता. सिन्नर ) हा फरार झाला असल्याने पोलीस त्याचा शोध घेत आहेत.